ਨਿਊਜ਼ ਪੰਜਾਬ
16 ਮਈ 2026
ਪੰਜਾਬ ਦੇ ਹੁਸ਼ਿਆਰਪੁਰ ਜ਼ਿਲ੍ਹੇ ਦੇ ਚੱਕ ਸਮਾਣਾ ਪਿੰਡ ਵਿੱਚ ਇੱਕ 4 ਸਾਲਾ ਬੱਚਾ ਖੁੱਲ੍ਹੇ ਬੋਰਵੈੱਲ ਵਿੱਚ ਡਿੱਗ ਗਿਆ, ਜਿਸਨੂੰ ਐਨਡੀਆਰਐਫ ਅਤੇ ਹੋਰ ਟੀਮਾਂ ਨੇ ਕਰੀਬ 9 ਘੰਟਿਆਂ ਦੀ ਮੁਸ਼ਕਲ ਕਾਰਵਾਈ ਤੋਂ ਬਾਅਦ ਸੁਰੱਖਿਅਤ ਬਾਹਰ ਕੱਢ ਲਿਆ। ਗੁਰਕਰਨ ਸਿੰਘ ਨਾਮ ਦਾ ਬੱਚਾ ਸ਼ਾਮ ਵੇਲੇ ਖੇਡਦਿਆਂ ਬੋਰਵੈੱਲ ਵਿੱਚ ਡਿੱਗ ਪਿਆ ਸੀ। ਬਚਾਅ ਟੀਮਾਂ ਨੇ ਰਾਤ 12:40 ਵਜੇ ਦੇ ਕਰੀਬ ਉਸਨੂੰ ਬਾਹਰ ਕੱਢ ਕੇ ਤੁਰੰਤ ਹਸਪਤਾਲ ਪਹੁੰਚਾਇਆ, ਜਿੱਥੇ ਉਸਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ।
ਬਚਾਅ ਕਾਰਜ ਦੌਰਾਨ ਐਨਡੀਆਰਐਫ, ਐਸਡੀਆਰਐਫ, ਪੰਜਾਬ ਪੁਲਿਸ, ਫਾਇਰ ਬ੍ਰਿਗੇਡ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਦੀਆਂ ਟੀਮਾਂ ਨੇ ਸਾਂਝੇ ਤੌਰ ‘ਤੇ ਕੰਮ ਕੀਤਾ। ਢਿੱਲੀ ਅਤੇ ਰੇਤਲੀ ਮਿੱਟੀ ਕਾਰਨ ਬਚਾਅ ਮੁਹਿੰਮ ਕਾਫੀ ਚੁਣੌਤੀਪੂਰਨ ਰਹੀ। ਬੱਚੇ ਤੱਕ ਪਹੁੰਚਣ ਲਈ ਸਮਾਨਾਂਤਰ ਖਾਈ ਅਤੇ ਤੰਗ ਸੁਰੰਗ ਬਣਾਈ ਗਈ। ਬਚਾਅ ਦੌਰਾਨ ਬੱਚੇ ਨੂੰ ਆਕਸੀਜਨ ਮੁਹੱਈਆ ਕਰਵਾਉਣ ਲਈ ਪਾਈਪ ਅਤੇ ਨਿਗਰਾਨੀ ਲਈ ਕੈਮਰਾ ਵੀ ਵਰਤਿਆ ਗਿਆ।
ਬਚਾਏ ਜਾਣ ਤੋਂ ਬਾਅਦ ਪਿੰਡ ਵਾਸੀਆਂ ਅਤੇ ਪਰਿਵਾਰ ਨੇ ਬਚਾਅ ਟੀਮਾਂ ਦਾ ਧੰਨਵਾਦ ਕੀਤਾ। ਅਧਿਕਾਰੀਆਂ ਅਨੁਸਾਰ, 40 ਤੋਂ ਵੱਧ ਐਨਡੀਆਰਐਫ ਕਰਮਚਾਰੀ ਇਸ ਮੁਹਿੰਮ ਵਿੱਚ ਸ਼ਾਮਲ ਰਹੇ।
