ਨਿਊਜ਼ ਪੰਜਾਬ
22 ਅਪ੍ਰੈਲ 2026
ਚਾਰਧਾਮ ਯਾਤਰਾ ਦੇ ਚੌਥੇ ਦਿਨ ਬੁੱਧਵਾਰ ਸਵੇਰੇ 8 ਵਜੇ ਕੇਦਾਰਨਾਥ ਧਾਮ ਦੇ ਕਪਾਟ ਰਸਮੀ ਤੌਰ ‘ਤੇ ਖੋਲ੍ਹ ਦਿੱਤੇ ਗਏ। ਇਸ ਮੌਕੇ ਧਾਮ ਨੂੰ ਕਰੀਬ 51 ਕੁਇੰਟਲ ਫੁੱਲਾਂ ਨਾਲ ਸੁੰਦਰ ਤਰੀਕੇ ਨਾਲ ਸਜਾਇਆ ਗਿਆ ਅਤੇ ਫੌਜ ਦੇ ਹੈਲੀਕਾਪਟਰ ਰਾਹੀਂ ਮੰਦਰ ‘ਤੇ ਫੁੱਲਾਂ ਦੀ ਵਰਖਾ ਕੀਤੀ ਗਈ, ਜਿਸ ਨਾਲ ਪੂਰਾ ਮਾਹੌਲ ਭਗਤੀਮਈ ਬਣ ਗਿਆ।
ਦੇਸ਼-ਵਿਦੇਸ਼ ਤੋਂ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ ਇਸ ਪਵਿੱਤਰ ਧਾਮ ਵਿੱਚ ਪਹੁੰਚੇ। ਪਰੰਪਰਾ ਅਨੁਸਾਰ ਸਭ ਤੋਂ ਪਹਿਲਾਂ ਮੰਦਰ ਦਾ ਪੂਰਬੀ ਦਰਵਾਜ਼ਾ ਖੋਲ੍ਹਿਆ ਗਿਆ ਅਤੇ ਮੁੱਖ ਪੁਜਾਰੀ, ਰਾਵਲ ਅਤੇ ਹੋਰ ਧਾਰਮਿਕ ਅਧਿਕਾਰੀਆਂ ਨੇ ਅੰਦਰ ਜਾ ਕੇ ਵਿਧੀਵਤ ਪੂਜਾ ਸ਼ੁਰੂ ਕੀਤੀ। ਇਸ ਦੌਰਾਨ ਜੋਤਿਰਲਿੰਗ ‘ਤੇ ਪਿਛਲੇ ਸਾਲ ਲਗਾਈ ਗਈ ਭਸਮ ਹਟਾ ਕੇ ਭਗਤਾਂ ਵਿੱਚ ਪ੍ਰਸ਼ਾਦ ਵਜੋਂ ਵੰਡ ਦਿੱਤੀ ਗਈ।
ਇਸ ਤੋਂ ਇੱਕ ਦਿਨ ਪਹਿਲਾਂ ਬਾਬਾ ਕੇਦਾਰ ਦੀ ਪੰਚਮੁਖੀ ਡੋਲੀ ਓਂਕਾਰੇਸ਼ਵਰ ਮੰਦਰ ਤੋਂ ਰਵਾਨਾ ਹੋ ਕੇ 17 ਕਿਲੋਮੀਟਰ ਦਾ ਪੈਦਲ ਸਫਰ ਤੈਅ ਕਰਦਿਆਂ ਕੇਦਾਰਨਾਥ ਪਹੁੰਚੀ। ਡੋਲੀ ਦੇ ਆਗਮਨ ‘ਤੇ ਹਜ਼ਾਰਾਂ ਸ਼ਰਧਾਲੂਆਂ ਨੇ “ਹਰ ਹਰ ਮਹਾਦੇਵ” ਦੇ ਜੈਕਾਰਿਆਂ ਨਾਲ ਸਵਾਗਤ ਕੀਤਾ ਅਤੇ ਫੁੱਲਾਂ ਦੀ ਵਰਖਾ ਕੀਤੀ।
ਮੰਦਰ ਪਰਿਸਰ ਵਿੱਚ 8ਵੀਂ ਸਿੱਖ ਰੈਜੀਮੈਂਟ ਬੈਂਡ ਦੀਆਂ ਧੁਨਾਂ ਅਤੇ ਢੋਲ-ਨਗਾਰੇ ਗੂੰਜੇ, ਜਿਸ ਨਾਲ ਮਾਹੌਲ ਹੋਰ ਵੀ ਆਧਿਆਤਮਿਕ ਹੋ ਗਿਆ। ਸੁਰੱਖਿਆ ਲਈ ਪੁਲਿਸ ਅਤੇ ITBP ਵੱਲੋਂ ਕੜੇ ਪ੍ਰਬੰਧ ਕੀਤੇ ਗਏ ਹਨ।ਇਸ ਮੌਕੇ ਉੱਤਰਾਖੰਡ ਦੇ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਵੀ ਮੰਦਰ ਪਹੁੰਚੇ ਅਤੇ ਉਨ੍ਹਾਂ ਵੱਲੋਂ ਨਰਿੰਦਰ ਮੋਦੀ ਦੇ ਨਾਮ ‘ਤੇ ਪਹਿਲੀ ਪੂਜਾ ਕੀਤੀ ਗਈ। ਵੈਦਿਕ ਰਸਮਾਂ ਪੂਰੀਆਂ ਹੋਣ ਤੋਂ ਬਾਅਦ ਮੰਦਰ ਦੇ ਕਪਾਟ ਆਮ ਭਗਤਾਂ ਲਈ ਖੋਲ੍ਹ ਦਿੱਤੇ ਗਏ ਅਤੇ ਦਰਸ਼ਨ ਸ਼ੁਰੂ ਹੋ ਗਏ।ਇਸ ਵਾਰ ਯਾਤਰਾ ਲਈ ਸਖ਼ਤ ਨਿਯਮ ਲਾਗੂ ਕੀਤੇ ਗਏ ਹਨ। ਮੰਦਰ ਦੇ 50–60 ਮੀਟਰ ਦੇ ਅੰਦਰ ਮੋਬਾਈਲ ਫੋਨ ਲੈ ਜਾਣ ‘ਤੇ ਪਾਬੰਦੀ ਹੈ ਅਤੇ ਮੁੱਖ ਪਰਿਸਰ ਵਿੱਚ ਫੋਟੋ ਜਾਂ ਵੀਡੀਓ ਬਣਾਉਣ ਦੀ ਮਨਾਹੀ ਹੈ। ਫੋਟੋਗ੍ਰਾਫੀ ਲਈ ਵੱਖਰਾ ਖੇਤਰ ਨਿਰਧਾਰਤ ਕੀਤਾ ਗਿਆ ਹੈ।
ਪਰੰਪਰਾ ਅਨੁਸਾਰ ਪਹਿਲੇ ਦਿਨ ਬਾਬਾ ਕੇਦਾਰਨਾਥ ਨੂੰ ਕੋਈ ਭੋਗ ਨਹੀਂ ਲਾਇਆ ਜਾਂਦਾ। ਭੋਗ ਦੀ ਪ੍ਰਥਾ ਭੈਰਵਨਾਥ ਮੰਦਰ ਦੇ ਕਪਾਟ ਖੁੱਲ੍ਹਣ ਤੋਂ ਬਾਅਦ ਹੀ ਸ਼ੁਰੂ ਹੁੰਦੀ ਹੈ, ਜੋ ਇਸ ਵਾਰ 25 ਅਪ੍ਰੈਲ ਨੂੰ ਖੁੱਲ੍ਹਣਗੇ। ਮਾਨਤਾ ਹੈ ਕਿ ਭੈਰਵਨਾਥ ਜੀ ਇਸ ਖੇਤਰ ਦੇ ਰੱਖਿਅਕ ਹਨ ਅਤੇ ਉਨ੍ਹਾਂ ਦੇ ਦਰਸ਼ਨ ਤੋਂ ਬਿਨਾਂ ਕੇਦਾਰਨਾਥ ਯਾਤਰਾ ਅਧੂਰੀ ਮੰਨੀ ਜਾਂਦੀ ਹੈ।
