ਨਿਊਜ਼ ਪੰਜਾਬ
12 ਅਗਸਤ 2026
ਪੰਜਾਬ ਵਿੱਚ 8ਵੀਂ ਜਮਾਤ ਦੇ ਨਤੀਜਿਆਂ ਵਿੱਚ ਅੱਵਲ ਰਹੀਆਂ ਤਿੰਨ ਹੋਣਹਾਰ ਵਿਦਿਆਰਥਣਾਂ ਨਾਲ ਭਗਵੰਤ ਮਾਨ ਨੇ ਚੰਡੀਗੜ੍ਹ ਵਿੱਚ ਆਪਣੇ ਨਿਵਾਸ ‘ਤੇ ਖਾਸ ਮੁਲਾਕਾਤ ਕੀਤੀ। ਇਸ ਦੌਰਾਨ ਮੁੱਖ ਮੰਤਰੀ ਦੀ ਪਤਨੀ ਗੁਰਪ੍ਰੀਤ ਕੌਰ ਵੀ ਮੌਜੂਦ ਰਹੀ। ਵਿਦਿਆਰਥਣਾਂ ਨੂੰ ਆਪਣੇ ਪਰਿਵਾਰਾਂ ਸਮੇਤ ਮਹਿਮਾਨ ਵਜੋਂ ਸੱਦਾ ਦਿੱਤਾ ਗਿਆ ਅਤੇ ਉਨ੍ਹਾਂ ਨੂੰ ਸਨਮਾਨਿਤ ਕੀਤਾ ਗਿਆ।
ਇਸ ਮੌਕੇ ਮੁੱਖ ਮੰਤਰੀ ਨੇ ਬੱਚਿਆਂ ਨਾਲ ਗੱਲਬਾਤ ਕਰਕੇ ਉਨ੍ਹਾਂ ਦੇ ਤਜ਼ਰਬੇ ਜਾਣੇ ਅਤੇ ਮਾਪਿਆਂ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਵਿਦਿਆਰਥਣਾਂ ਨੂੰ ਪ੍ਰੇਰਿਤ ਕਰਦਿਆਂ ਕਿਹਾ ਕਿ ਉਹ ਆਪਣੀ ਪੜ੍ਹਾਈ ਪੂਰੀ ਲਗਨ ਨਾਲ ਜਾਰੀ ਰੱਖਣ ਅਤੇ ਅਜਿਹਾ ਕੰਮ ਕਰਨ ਕਿ ਉਹਨਾਂ ਦਾ ਕੋਈ ਦੂਜਾ ਵਿਕਲਪ ਨਾ ਬਣ ਸਕੇ। ਇਹ ਪ੍ਰੋਗਰਾਮ ਲਗਭਗ ਅੱਧੇ ਘੰਟੇ ਤੱਕ ਚੱਲਿਆ।
ਮੁੱਖ ਮੰਤਰੀ ਨੇ ਆਪਣੇ ਸੰਦੇਸ਼ ਵਿੱਚ ਕਿਹਾ ਕਿ ਇਸ ਵਾਰ ਦੇ ਨਤੀਜੇ ਦਿਖਾਉਂਦੇ ਹਨ ਕਿ ਆਮ ਪਰਿਵਾਰਾਂ ਦੇ ਬੱਚੇ ਵੀ ਵੱਡੀਆਂ ਉਪਲਬਧੀਆਂ ਹਾਸਲ ਕਰ ਰਹੇ ਹਨ। ਪਹਿਲਾ ਸਥਾਨ ਇੱਕ ਭੱਠੇ ‘ਤੇ ਕੰਮ ਕਰਨ ਵਾਲੇ ਮੁਨੀਮ ਦੀ ਬੇਟੀ ਨੇ, ਦੂਜਾ ਸਥਾਨ ਟਾਈਲਾਂ ਦੀ ਦੁਕਾਨਦਾਰ ਦੀ ਬੇਟੀ ਨੇ ਅਤੇ ਤੀਜਾ ਸਥਾਨ ਇੱਕ ਸਰਕਾਰੀ ਅਧਿਆਪਕ ਦੀ ਬੇਟੀ ਨੇ ਹਾਸਲ ਕੀਤਾ।
ਨਤੀਜਿਆਂ ਦੇ ਮੁੱਖ ਅੰਕੜੇ
Punjab School Education Board ਵੱਲੋਂ ਜਾਰੀ ਨਤੀਜਿਆਂ ਅਨੁਸਾਰ:
ਕੁੱਲ ਵਿਦਿਆਰਥੀ: 2,62,966
ਸਫਲ ਵਿਦਿਆਰਥੀ: 2,53,789
ਕੁੱਲ ਪਾਸ ਪ੍ਰਤੀਸ਼ਤਤਾ: 96.51%
ਟੌਪਰ ਵਿਦਿਆਰਥਣਾਂ
ਤਮਨਾ (ਫਰੀਦਕੋਟ) – 600/600 (100%)
ਜਪਨੀਤ ਕੌਰ (ਸੰਗਰੂਰ) – 598/600 (99.67%)
ਜਸ਼ਨਦੀਪ ਕੌਰ (ਫਰੀਦਕੋਟ) – 598/600 (99.67%)
