ਨਿਊਜ਼ ਪੰਜਾਬ
25 ਅਗਸਤ 2025
ਦਿੱਲੀ ਮੈਟਰੋ ਦੀ ਯਾਤਰਾ ਅੱਜ ਤੋਂ ਮਹਿੰਗੀ ਹੋ ਗਈ ਹੈ। ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ ਨੇ ਯਾਤਰੀਆਂ ਲਈ ਕਿਰਾਏ ਵਿੱਚ ਮਾਮੂਲੀ ਵਾਧਾ ਕੀਤਾ ਹੈ। ਡੀਐਮਆਰਸੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਪੋਸਟ ਕਰਕੇ ਕਿਹਾ ਕਿ ਨਵੀਆਂ ਦਰਾਂ 25 ਅਗਸਤ 2025 (ਸੋਮਵਾਰ) ਤੋਂ ਲਾਗੂ ਹੋ ਗਈਆਂ ਹਨ। ਨਵੇਂ ਕਿਰਾਏ ਦੇ ਤਹਿਤ, ਕਿਰਾਇਆ 1 ਰੁਪਏ ਤੋਂ ਵਧਾ ਕੇ 4 ਰੁਪਏ ਕਰ ਦਿੱਤਾ ਗਿਆ ਹੈ।
ਕਿਰਾਏ ਵਿੱਚ ਵਾਧੇ ਪਿੱਛੇ ਤਰਕ ਇਹ ਹੈ ਕਿ ਮੈਟਰੋ ਫੇਜ਼ 4 ਮੁਕੰਮਲ ਹੋਣ ਦੇ ਆਖਰੀ ਪੜਾਅ ‘ਤੇ ਹੈ ਅਤੇ ਇਸ ਤੋਂ ਬਾਅਦ ਰੱਖ-ਰਖਾਅ ਦੀ ਲਾਗਤ ਵਧੇਗੀ, ਜਿਸ ਕਾਰਨ ਕਿਰਾਇਆ ਵਧਾਇਆ ਗਿਆ ਹੈ। ਆਖਰੀ ਵਾਰ ਮੈਟਰੋ ਦਾ ਕਿਰਾਇਆ ਸਾਲ 2017 ਵਿੱਚ ਵਧਾਇਆ ਗਿਆ ਸੀ। ਪਹਿਲੀ ਵਾਰ, ਡੀਐਮਆਰਸੀ ਨੇ ਨਿਰਪੱਖ ਨਿਰਧਾਰਨ ਕਮੇਟੀ ਬਣਾਏ ਬਿਨਾਂ ਕਿਰਾਇਆ ਵਧਾਇਆ ਹੈ। ਦੱਸ ਦਈਏ ਕਿ ਪਿਛਲੀ ਵਾਰ ਬਣਾਈ ਗਈ ਕਮੇਟੀ ਨੇ ਭਵਿੱਖ ਵਿੱਚ ਬਿਨਾਂ ਕਿਸੇ ਕਮੇਟੀ ਦੇ ਕਿਰਾਏ ਵਿੱਚ ਵਾਧੇ ਦੀ ਇਜਾਜ਼ਤ ਦੇ ਦਿੱਤੀ ਸੀ।
ਨਵੇਂ ਕਿਰਾਏ ਅਨੁਸਾਰ ਆਮ ਦਿਨਾਂ ਵਿੱਚ, 0-2 ਕਿਲੋਮੀਟਰ ਦੀ ਯਾਤਰਾ ਦਾ ਕਿਰਾਇਆ 10 ਰੁਪਏ ਤੋਂ ਵਧਾ ਕੇ 11 ਰੁਪਏ, 2-5 ਕਿਲੋਮੀਟਰ ਦਾ ਕਿਰਾਇਆ 20 ਰੁਪਏ ਤੋਂ ਵਧਾ ਕੇ 21 ਰੁਪਏ, 5-12 ਕਿਲੋਮੀਟਰ ਦੀ ਯਾਤਰਾ ਦਾ ਕਿਰਾਇਆ 30 ਰੁਪਏ ਤੋਂ ਵਧਾ ਕੇ 32 ਰੁਪਏ, 12-21 ਕਿਲੋਮੀਟਰ ਦੀ ਯਾਤਰਾ ਦਾ ਕਿਰਾਇਆ 40 ਰੁਪਏ ਤੋਂ ਵਧਾ ਕੇ 43 ਰੁਪਏ, 21-32 ਕਿਲੋਮੀਟਰ ਦੀ ਯਾਤਰਾ ਦਾ ਕਿਰਾਇਆ 50 ਰੁਪਏ ਤੋਂ ਵਧਾ ਕੇ 54 ਰੁਪਏ ਅਤੇ 32 ਕਿਲੋਮੀਟਰ ਤੋਂ ਵੱਧ ਦੂਰੀ ਲਈ ਕਿਰਾਇਆ 60 ਰੁਪਏ ਤੋਂ ਵਧਾ ਕੇ 64 ਰੁਪਏ ਕਰ ਦਿੱਤਾ ਗਿਆ ਹੈ।
