ਦਿੱਲੀ’ਚ ਸ਼ੀਤ ਲਹਿਰ ਦੇ ਤੇਜ਼ ਹੋਣ ਕਾਰਨ IMD ਨੇ ਜਾਰੀ ਕੀਤੀ’ਯੈਲੋ ਅਲਰਟ’67 ਟਰੇਨਾਂ 10 ਘੰਟੇ ਦੀ ਦੇਰੀ ਨਾਲ

ਮੌਸਮ ਵਿਭਾਗ,13 ਜਨਵਰੀ 2025

ਦੇਸ਼ ਦੇ ਉੱਤਰੀ ਅਤੇ ਮੱਧ ਭਾਰਤੀ ਰਾਜਾਂ ਵਿੱਚ ਪਾਰਾ ਲਗਾਤਾਰ ਡਿੱਗ ਰਿਹਾ ਹੈ। ਇਸ ਦੇ ਨਾਲ ਹੀ ਸੰਘਣੀ ਧੁੰਦ ਦਾ ਅਸਰ ਵੀ ਦੇਖਣ ਨੂੰ ਮਿਲ ਰਿਹਾ ਹੈ।ਸੰਘਣੀ ਧੁੰਦ ਕਾਰਨ ਯੂਪੀ ਦੇ 64 ਜ਼ਿਲ੍ਹਿਆਂ ਵਿੱਚ ਵਿਜ਼ੀਬਿਲਟੀ 50 ਮੀਟਰ ਤੱਕ ਘੱਟ ਗਈ ਹੈ। ਇਸ ਕਾਰਨ 67 ਟਰੇਨਾਂ 10 ਘੰਟੇ ਦੇਰੀ ਨਾਲ ਪੁੱਜੀਆਂ। ਮਹੋਬਾ ਵਿੱਚ ਠੰਢ ਕਾਰਨ ਇੱਕ ਨੌਜਵਾਨ ਦੀ ਮੌਤ ਹੋ ਗਈ।

 

ਦਿੱਲੀ ‘ਚ ਵੀ ਵਿਜ਼ੀਬਿਲਟੀ ਘੱਟ ਹੋਣ ਕਾਰਨ ਕਈ ਟਰੇਨਾਂ ਅਤੇ ਕੁਝ ਫਲਾਈਟਾਂ ‘ਚ ਦੇਰੀ ਹੋਈ। ਇੱਥੋਂ ਤੱਕ ਕਿ ਤਾਮਿਲਨਾਡੂ ਦੇ ਚੇਨਈ ਹਵਾਈ ਅੱਡੇ ‘ਤੇ ਵੀ ਉਡਾਣਾਂ ਆਪਣੇ ਨਿਰਧਾਰਤ ਸਮੇਂ ‘ਤੇ ਨਹੀਂ ਉਤਰ ਸਕੀਆਂ।ਹਿਮਾਚਲ ‘ਚ ਬਰਫਬਾਰੀ ਕਾਰਨ ਕਈ ਸ਼ਹਿਰਾਂ ‘ਚ ਤਾਪਮਾਨ ‘ਚ ਗਿਰਾਵਟ ਦਰਜ ਕੀਤੀ ਗਈ ਹੈ। ਸ਼ਿਮਲਾ ‘ਚ ਪਿਛਲੇ 48 ਘੰਟਿਆਂ ‘ਚ ਵੱਧ ਤੋਂ ਵੱਧ ਤਾਪਮਾਨ 11.4 ਡਿਗਰੀ ਡਿੱਗ ਕੇ 5.6 ਡਿਗਰੀ ‘ਤੇ ਆ ਗਿਆ ਹੈ।ਬਿਹਾਰ ਦੇ ਪਟਨਾ ਸਮੇਤ 4 ਜ਼ਿਲ੍ਹਿਆਂ ਅਤੇ ਰਾਜਸਥਾਨ ਦੇ ਜੈਪੁਰ ਸਮੇਤ 19 ਜ਼ਿਲ੍ਹਿਆਂ ਵਿੱਚ ਅੱਠਵੀਂ ਜਮਾਤ ਤੱਕ ਛੁੱਟੀ ਦਾ ਐਲਾਨ ਕੀਤਾ ਗਿਆ ਹੈ।

ਮੌਸਮ ਵਿਭਾਗ ਨੇ ਪੰਜਾਬ, ਹਰਿਆਣਾ, ਚੰਡੀਗੜ੍ਹ ਸਮੇਤ 15 ਰਾਜਾਂ ਵਿੱਚ ਧੁੰਦ ਦਾ ਅਲਰਟ ਜਾਰੀ ਕੀਤਾ ਹੈ। ਇਸ ਦੇ ਨਾਲ ਹੀ ਅਰੁਣਾਚਲ, ਅਸਮ, ਮੇਘਾਲਿਆ, ਨਾਗਾਲੈਂਡ, ਤਾਮਿਲਨਾਡੂ, ਪੁਡੂਚੇਰੀ ‘ਚ ਵੀ ਬਾਰਿਸ਼ ਦੀ ਭਵਿੱਖਬਾਣੀ ਕੀਤੀ ਗਈ ਹੈ।

ਕਸ਼ਮੀਰ ‘ਚ ਪਾਰਾ ਵਧਣ ਦੇ ਬਾਵਜੂਦ ਤਾਪਮਾਨ ਮਨਫ਼ੀ ਹੈ

ਕਸ਼ਮੀਰ ਵਿੱਚ ਰਾਤ ਭਰ ਬੱਦਲਵਾਈ ਰਹਿਣ ਕਾਰਨ ਘੱਟੋ-ਘੱਟ ਤਾਪਮਾਨ ਵਿੱਚ ਮਾਮੂਲੀ ਵਾਧਾ ਹੋਇਆ ਹੈ। ਇਸ ਦੇ ਬਾਵਜੂਦ ਪਾਰਾ ਮਾਈਨਸ ‘ਚ ਬਣਿਆ ਹੋਇਆ ਹੈ।

ਸ੍ਰੀਨਗਰ ਵਿੱਚ ਤਾਪਮਾਨ -3°, ਗੁਲਮਰਗ ਵਿੱਚ -5.6°, ਪਹਿਲਗਾਮ ਵਿੱਚ -6.2°, ਕਾਜ਼ੀਗੁੰਡ ਵਿੱਚ -4°, ਕੋਨੀਬਲ ਵਿੱਚ -3.6°, ਕੁਪਵਾੜਾ ਵਿੱਚ -4° ਦਰਜ ਕੀਤਾ ਗਿਆ।ਜੰਮੂ-ਕਸ਼ਮੀਰ ‘ਚ ਕੜਾਕੇ ਦੀ ਠੰਡ ਦੇ ਦੌਰ ‘ਚ ਚਿੱਲਈ-ਕਲਾਂ ‘ਚ ਅਜੇ 17 ਦਿਨ ਬਾਕੀ ਹਨ। ਇਹ 30 ਜਨਵਰੀ ਨੂੰ ਖਤਮ ਹੋਵੇਗਾ।ਇਸ ਤੋਂ ਬਾਅਦ 20 ਦਿਨ ਚਿੱਲਈ-ਖੁਰਦ (ਥੋੜ੍ਹੀ ਠੰਢ) ਅਤੇ 10 ਦਿਨ ਚਿੱਲਈ-ਬੱਚਾ (ਥੋੜ੍ਹੀ ਠੰਢ) ਦਾ ਮੌਸਮ ਹੋਵੇਗਾ।