ਨਿਊਜ਼ ਪੰਜਾਬ
13 ਨਵੰਬਰ,2026
ਉੱਤਰ ਪ੍ਰਦੇਸ਼ ਦੀ ਯੋਗੀ ਆਦਿੱਤਿਆਨਾਥ ਸਰਕਾਰ ਨੇ ਪ੍ਰਸ਼ਾਸਕੀ ਪੱਧਰ ‘ਤੇ ਵੱਡਾ ਫੇਰਬਦਲ ਕਰਦਿਆਂ ਦੋ ਆਈਪੀਐਸ ਅਧਿਕਾਰੀਆਂ ਦੇ ਤਬਾਦਲੇ ਕੀਤੇ ਹਨ। ਗ੍ਰਹਿ ਵਿਭਾਗ ਵੱਲੋਂ ਜਾਰੀ ਹੁਕਮਾਂ ਅਨੁਸਾਰ ਮੁਰਾਦਾਬਾਦ ਰੇਂਜ ਦੇ ਡੀਆਈਜੀ ਮੁਨੀਰਾਜ ਜੀ ਨੂੰ ਬਦਲ ਕੇ ਬਰੇਲੀ ਰੇਂਜ ਦਾ ਡੀਆਈਜੀ ਨਿਯੁਕਤ ਕੀਤਾ ਗਿਆ ਹੈ, ਜਦਕਿ ਬਰੇਲੀ ਰੇਂਜ ਦੇ ਡੀਆਈਜੀ ਅਜੈ ਕੁਮਾਰ ਸਾਹਨੀ ਨੂੰ ਮੁਰਾਦਾਬਾਦ ਰੇਂਜ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਦੋਵੇਂ ਅਧਿਕਾਰੀ 2009 ਬੈਚ ਦੇ ਆਈਪੀਐਸ ਅਧਿਕਾਰੀ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਤਬਾਦਲੇ ਪਿੱਛੇ ਚੋਣ ਕਮਿਸ਼ਨ ਦੇ ਉਹ ਨਿਰਦੇਸ਼ ਵੀ ਅਹਿਮ ਕਾਰਨ ਹਨ, ਜਿਨ੍ਹਾਂ ਤਹਿਤ ਇੱਕੋ ਜ਼ਿਲ੍ਹੇ ਵਿੱਚ ਤਿੰਨ ਸਾਲ ਜਾਂ ਇਸ ਤੋਂ ਵੱਧ ਸਮੇਂ ਤੋਂ ਤਾਇਨਾਤ ਅਧਿਕਾਰੀਆਂ ਦੇ ਤਬਾਦਲੇ ਕਰਨ ਲਈ ਕਿਹਾ ਗਿਆ ਸੀ।
