ਨਿਊਜ਼ ਪੰਜਾਬ
8 ਅਕਤੂਬਰ,2026
ਵੀਰਵਾਰ, 8 ਅਕਤੂਬਰ ਦਾ ਦਿਨ ਭਾਰਤੀ ਸ਼ੇਅਰ ਬਾਜ਼ਾਰ ਲਈ ਭਾਰੀ ਗਿਰਾਵਟ ਵਾਲਾ ਰਿਹਾ। ਕਮਜ਼ੋਰ ਗਲੋਬਲ ਸੰਕੇਤਾਂ, ਵਿਆਪਕ ਵਿਕਰੀ ਅਤੇ ਨਿਵੇਸ਼ਕਾਂ ਦੀ ਵਧੀ ਚਿੰਤਾ ਕਾਰਨ ਬਾਜ਼ਾਰ ਦੇ ਪ੍ਰਮੁੱਖ ਸੂਚਕਾਂਕਾਂ ਵਿੱਚ ਵੱਡੀ ਗਿਰਾਵਟ ਦਰਜ ਕੀਤੀ ਗਈ। ਕਾਰੋਬਾਰ ਦੇ ਅੰਤ ਵਿੱਚ ਬੀਐਸਈ ਸੈਂਸੈਕਸ 1,045.46 ਅੰਕ ਜਾਂ 1.44 ਫੀਸਦੀ ਡਿੱਗ ਕੇ 71,593.24 ਦੇ ਪੱਧਰ ’ਤੇ ਬੰਦ ਹੋਇਆ। ਇਸੇ ਤਰ੍ਹਾਂ ਨਿਫਟੀ 371.25 ਅੰਕ ਜਾਂ 1.64 ਫੀਸਦੀ ਦੀ ਗਿਰਾਵਟ ਨਾਲ 22,231.80 ’ਤੇ ਆ ਗਿਆ। ਇਸ ਭਾਰੀ ਗਿਰਾਵਟ ਕਾਰਨ ਸ਼ੇਅਰ ਬਾਜ਼ਾਰ ਦੇ ਨਿਵੇਸ਼ਕਾਂ ਦੀ ਲਗਭਗ ₹10 ਲੱਖ ਕਰੋੜ ਦੀ ਪੂੰਜੀ ਨੂੰ ਝਟਕਾ ਲੱਗਿਆ। ਬਾਜ਼ਾਰ ਵਿੱਚ ਵਿਕਰੀ ਦਾ ਦਬਾਅ ਇੰਨਾ ਜ਼ਿਆਦਾ ਰਿਹਾ ਕਿ 3,280 ਤੋਂ ਵੱਧ ਸਟਾਕ ਗਿਰਾਵਟ ਨਾਲ ਬੰਦ ਹੋਏ, ਜਦਕਿ ਸਿਰਫ਼ 951 ਸਟਾਕਾਂ ਵਿੱਚ ਤੇਜ਼ੀ ਦੇਖੀ ਗਈ। ਰੀਅਲਟੀ, ਐਨਰਜੀ, ਇਨਫਰਾਸਟਰੱਕਚਰ, ਫਾਰਮਾ ਅਤੇ FMCG ਵਰਗੇ ਸੈਕਟਰਾਂ ਵਿੱਚ ਵੀ 2 ਤੋਂ 3 ਫੀਸਦੀ ਤੱਕ ਦੀ ਗਿਰਾਵਟ ਰਹੀ। ਮਾਹਿਰਾਂ ਮੁਤਾਬਕ ਅਮਰੀਕੀ ਬਾਂਡ ਯੀਲਡ ਵਿੱਚ ਤੇਜ਼ੀ, ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਅਤੇ ਵਿਸ਼ਵ ਪੱਧਰ ’ਤੇ ਤਣਾਅ ਨੇ ਭਾਰਤੀ ਬਾਜ਼ਾਰ ’ਤੇ ਦਬਾਅ ਵਧਾਇਆ। ਇਸ ਤੋਂ ਇਲਾਵਾ ਵਿਆਜ ਦਰਾਂ ਨੂੰ ਲੈ ਕੇ ਨਿਵੇਸ਼ਕਾਂ ਦੀ ਚਿੰਤਾ ਅਤੇ ਵਿਦੇਸ਼ੀ ਬਾਜ਼ਾਰਾਂ ਵਿੱਚ ਕਮਜ਼ੋਰੀ ਦਾ ਵੀ ਭਾਰਤੀ ਸ਼ੇਅਰ ਬਾਜ਼ਾਰ ’ਤੇ ਅਸਰ ਪਿਆ।
