ਨਿਊਜ਼ ਪੰਜਾਬ
ਨਵੀ ਦਿਲੀ , 1 ਜੁਲਾਈ – ਅੱਜ, 1 ਜੁਲਾਈ 2025 ਤੋਂ, ਤੁਹਾਨੂੰ ਰੇਲਵੇ ਨੂੰ ਥੋੜ੍ਹਾ ਵਾਧੂ ਕਿਰਾਇਆ ਦੇਣਾ ਪਵੇਗਾ ਅਤੇ ਤਤਕਾਲ ਬੁਕਿੰਗ ਲਈ ਨਿਯਮ ਬਦਲ ਗਏ ਹਨ । ਪਰ ਰੋਜ਼ਾਨਾ ਲੋਕਲ ਟ੍ਰੇਨ ਰਾਹੀਂ ਯਾਤਰਾ ਕਰਨ ਵਾਲੇ ਯਾਤਰੀਆਂ ਲਈ ਕੋਈ ਬਦਲਾਅ ਨਹੀਂ ਹੋਵੇਗਾ। ਰੇਲਵੇ ਮੰਤਰਾਲੇ ਨੇ ਏ ਸੀ ਦੇ ਨਾਲ-ਨਾਲ ਗੈਰ-ਏ ਸੀ ਟ੍ਰੇਨਾਂ ਦੇ ਕਿਰਾਏ ਵਧਾ ਦਿੱਤੇ ਹਨ, ਜੋ ਕਿ ਅੱਜ ਯਾਨੀ 1 ਜੁਲਾਈ 2025 ਤੋਂ ਲਾਗੂ ਹੋ ਰਿਹਾ ਹੈ।
ਆਧਾਰ ਤੋਂ ਬਿਨਾਂ ਤਤਕਾਲ ਟਿਕਟ ਨਹੀਂ ਮਿਲੇਗੀ
ਰੇਲਵੇ ਵਿੱਚ ਤਤਕਾਲ ਟਿਕਟਾਂ ਬੁੱਕ ਕਰਨ ਦੇ ਨਿਯਮ ਵੀ 1 ਜੁਲਾਈ ਤੋਂ ਬਦਲ ਗਏ ਹਨ। ਤਤਕਾਲ ਟਿਕਟਾਂ ਸਿਰਫ਼ ਉਨ੍ਹਾਂ ਯਾਤਰੀਆਂ ਲਈ ਉਪਲਬਧ ਹੋਣਗੀਆਂ ਜਿਨ੍ਹਾਂ ਦਾ ਆਈਆਰਸੀਟੀਸੀ ਖਾਤਾ ਆਧਾਰ ਨਾਲ ਜੁੜਿਆ ਹੋਇਆ ਹੈ। ਜੁਲਾਈ ਦੇ ਮੱਧ ਤੋਂ ਓਟੀਪੀ ਅਧਾਰਤ ਪ੍ਰਮਾਣੀਕਰਨ ਲਾਜ਼ਮੀ ਹੋ ਜਾਵੇਗਾ, ਜੋ ਕਿ ਆਧਾਰ ਨਾਲ ਜੁੜੇ ਮੋਬਾਈਲ ਨੰਬਰ ‘ਤੇ ਆਵੇਗਾ। ਰੇਲਵੇ ਏਜੰਟ ਤਤਕਾਲ ਬੁਕਿੰਗ ਸ਼ੁਰੂ ਹੋਣ ਦੇ ਪਹਿਲੇ 30 ਮਿੰਟਾਂ ਲਈ ਟਿਕਟਾਂ ਬੁੱਕ ਨਹੀਂ ਕਰ ਸਕਣਗੇ।
ਰੋਜ਼ਾਨਾ ਯਾਤਰੀਆਂ ਦੇ ਹਿੱਤ ਵਿੱਚ, ਲੌਕਲ ਟ੍ਰੇਨਾਂ ਅਤੇ ਮਾਸਿਕ ਸੀਜ਼ਨ ਟਿਕਟਾਂ ਦੀਆਂ ਕੀਮਤਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ। ਆਮ ਦੂਜੇ ਦਰਜੇ ਦਾ ਕਿਰਾਇਆ 500 ਕਿਲੋਮੀਟਰ ਤੱਕ ਨਹੀਂ ਵਧਾਇਆ ਗਿਆ ਹੈ ਅਤੇ ਇਸ ਤੋਂ ਵੱਧ ਦੂਰੀਆਂ ਲਈ, ਟਿਕਟ ਦੀਆਂ ਕੀਮਤਾਂ ਵਿੱਚ ਪ੍ਰਤੀ ਕਿਲੋਮੀਟਰ ਅੱਧਾ ਪੈਸਾ ਵਾਧਾ ਕੀਤਾ ਗਿਆ ਹੈ। ਆਮ ਸਲੀਪਰ ਕਲਾਸ ਅਤੇ ਪਹਿਲੀ ਸ਼੍ਰੇਣੀ ਦੇ ਯਾਤਰੀਆਂ ਨੂੰ ਵੀ 1 ਜੁਲਾਈ ਤੋਂ ਪ੍ਰਤੀ ਕਿਲੋਮੀਟਰ ਅੱਧਾ ਪੈਸਾ ਵੱਧ ਦੇਣਾ ਪਵੇਗਾ।
ਇਨ੍ਹਾਂ ਟ੍ਰੇਨਾਂ ‘ਤੇ ਵੀ ਕਿਰਾਇਆ ਲਾਗੂ ਹੋਵੇਗਾ
ਰੇਲਵੇ ਮੰਤਰਾਲੇ ਦੇ ਅਨੁਸਾਰ, ਨਵਾਂ ਕਿਰਾਇਆ ਸੋਧ ਰਾਜਧਾਨੀ, ਸ਼ਤਾਬਦੀ, ਦੁਰੰਤੋ, ਵੰਦੇ ਭਾਰਤ, ਤੇਜਸ, ਹਮਸਫ਼ਰ, ਅੰਮ੍ਰਿਤ ਭਾਰਤ, ਮਹਾਮਨਾ, ਗਤੀਮਾਨ, ਅੰਤਯੋਦਯ, ਜਨ ਸ਼ਤਾਬਦੀ, ਯੁਵਾ ਐਕਸਪ੍ਰੈਸ, ਏਸੀ ਵਿਸਟਾਡੋਮ ਕੋਚ, ਅਨੁਭੂਤੀ ਕੋਚ ਅਤੇ ਆਮ ਗੈਰ-ਉਪਨਗਰੀਏ ਸੇਵਾਵਾਂ ਵਰਗੀਆਂ ਪ੍ਰੀਮੀਅਰ ਅਤੇ ਵਿਸ਼ੇਸ਼ ਰੇਲ ਸੇਵਾਵਾਂ ‘ਤੇ ਵੀ ਲਾਗੂ ਹੋਵੇਗਾ।
