ਨਿਊਜ਼ ਪੰਜਾਬ
1 ਅਕਤੂਬਰ,2026
ਨਵਰਾਤਰੀ, ਦੁਰਗਾ ਪੂਜਾ, ਦੁਸਹਿਰਾ ਅਤੇ ਦੀਵਾਲੀ ਵਰਗੇ ਵੱਡੇ ਤਿਉਹਾਰਾਂ ਦੌਰਾਨ ਮਠਿਆਈਆਂ ਦੀ ਭਾਰੀ ਮੰਗ ਰਹਿੰਦੀ ਹੈ, ਜਿਸ ਕਾਰਨ ਖੰਡ ਦੀ ਖਪਤ ਵੀ ਕਾਫ਼ੀ ਵੱਧ ਜਾਂਦੀ ਹੈ। ਤਿਉਹਾਰੀ ਸੀਜ਼ਨ ਵਿੱਚ ਵਧਦੀ ਮੰਗ ਦੇ ਚਲਦਿਆਂ ਖੰਡ ਦੀਆਂ ਕੀਮਤਾਂ ਵਿੱਚ ਵਾਧਾ ਨਾ ਹੋਵੇ, ਇਸ ਲਈ ਸਰਕਾਰ ਨੇ ਵੱਡਾ ਕਦਮ ਚੁੱਕਦਿਆਂ ਖੰਡ ਦੀ ਵਿਕਰੀ ਦਾ ਕੋਟਾ ਵਧਾ ਦਿੱਤਾ ਹੈ। ਖੁਰਾਕ ਅਤੇ ਜਨਤਕ ਵੰਡ ਵਿਭਾਗ ਨੇ ਅਕਤੂਬਰ ਦੇ ਪਹਿਲੇ 15 ਦਿਨਾਂ ਲਈ 1.40 ਮਿਲੀਅਨ ਟਨ ਖੰਡ ਦੀ ਵਿਕਰੀ ਦਾ ਕੋਟਾ ਨਿਰਧਾਰਤ ਕੀਤਾ ਹੈ, ਜਦਕਿ ਸਤੰਬਰ ਦੇ ਇਸੇ ਸਮੇਂ ਲਈ ਇਹ ਕੋਟਾ 1.30 ਮਿਲੀਅਨ ਟਨ ਸੀ। ਸਰਕਾਰ ਨੇ ਸਤੰਬਰ ਤੋਂ ਹਰ 15 ਦਿਨਾਂ ਬਾਅਦ ਖੰਡ ਦੀ ਮੰਗ ਅਤੇ ਬਾਜ਼ਾਰ ਵਿੱਚ ਉਪਲਬਧਤਾ ਦੀ ਸਮੀਖਿਆ ਕਰਕੇ ਕੋਟਾ ਤੈਅ ਕਰਨ ਦੀ ਪ੍ਰਣਾਲੀ ਸ਼ੁਰੂ ਕੀਤੀ ਹੈ। ਪਹਿਲਾਂ ਪੂਰੇ ਮਹੀਨੇ ਲਈ ਇੱਕੋ ਵਾਰ ਕੋਟਾ ਜਾਰੀ ਕੀਤਾ ਜਾਂਦਾ ਸੀ, ਜਿਸ ਕਾਰਨ ਕਈ ਵਾਰ ਮਹੀਨੇ ਦੇ ਅੰਤ ਵਿੱਚ ਸਟਾਕ ਰੋਕਣ ਅਤੇ ਕੀਮਤਾਂ ਵਧਣ ਦੀ ਸਥਿਤੀ ਬਣ ਜਾਂਦੀ ਸੀ। ਨਵੀਂ ਪ੍ਰਣਾਲੀ ਦਾ ਮਕਸਦ ਬਾਜ਼ਾਰ ਵਿੱਚ ਖੰਡ ਦੀ ਸਪਲਾਈ ਨੂੰ ਸਥਿਰ ਰੱਖਣਾ ਅਤੇ ਕੀਮਤਾਂ ਵਿੱਚ ਅਚਾਨਕ ਤੇਜ਼ੀ ਨੂੰ ਰੋਕਣਾ ਹੈ। ਜੁਲਾਈ ਅਤੇ ਅਗਸਤ ਦੌਰਾਨ ਖੰਡ ਦੀਆਂ ਕੀਮਤਾਂ ਵਿੱਚ ਤੇਜ਼ ਵਾਧਾ ਦੇਖਿਆ ਗਿਆ ਸੀ, ਪਰ ਸਰਕਾਰ ਵੱਲੋਂ ਸਪਲਾਈ ਸੁਧਾਰਨ ਲਈ ਚੁੱਕੇ ਗਏ ਕਦਮਾਂ ਤੋਂ ਬਾਅਦ ਪ੍ਰਚੂਨ ਕੀਮਤਾਂ ਰਿਕਾਰਡ ਉੱਚ ਪੱਧਰ ਤੋਂ ਲਗਭਗ 11 ਤੋਂ 12 ਫੀਸਦੀ ਘਟ ਕੇ ਔਸਤਨ 57.50 ਰੁਪਏ ਪ੍ਰਤੀ ਕਿਲੋਗ੍ਰਾਮ ਦੇ ਕਰੀਬ ਆ ਗਈਆਂ ਹਨ।
