ਨਿਊਜ਼ ਪੰਜਾਬ
19 ਮਾਰਚ 2026
ਪੰਜਾਬੀ ਅਦਾਕਾਰ-ਗਾਇਕ ਦਿਲਜੀਤ ਦੋਸਾਂਝ ਦਾ ‘ਦਿਲ-ਲੁਮਿਨਾਟੀ ਇੰਡੀਆ ਟੂਰ 2024’ ਭਾਰਤੀ ਲਾਈਵ ਸੰਗੀਤ ਇਤਿਹਾਸ ਵਿੱਚ ਇਕ ਨਵਾਂ ਮੀਲ ਪੱਥਰ ਸਾਬਤ ਹੋਇਆ ਹੈ। ਮਾਰਚ 2026 ਵਿੱਚ ਜਾਰੀ ਅਰਨਸਟ ਐਂਡ ਯੰਗ (EY) ਦੀ ਸਮਾਜਿਕ-ਆਰਥਿਕ ਪ੍ਰਭਾਵ ਰਿਪੋਰਟ ਅਨੁਸਾਰ, ਇਸ ਟੂਰ ਨੇ ਕੁੱਲ 943 ਕਰੋੜ ਰੁਪਏ ਦੀ ਆਰਥਿਕ ਗਤੀਵਿਧੀ ਪੈਦਾ ਕੀਤੀ, ਜਿਸ ਵਿੱਚੋਂ 114 ਕਰੋੜ ਰੁਪਏ ਟੈਕਸ ਦੇ ਰੂਪ ਵਿੱਚ ਮਿਲੇ ਅਤੇ ਲਗਭਗ 1.2 ਲੱਖ ਲੋਕਾਂ ਨੂੰ ਰੁਜ਼ਗਾਰ ਪ੍ਰਾਪਤ ਹੋਇਆ। ਟੂਰ ਦੌਰਾਨ 13 ਸ਼ਹਿਰਾਂ ਵਿੱਚ 14 ਸ਼ੋਅ ਕਰਵਾਏ ਗਏ, ਜਿਨ੍ਹਾਂ ਵਿੱਚ 3.2 ਲੱਖ ਤੋਂ ਵੱਧ ਦਰਸ਼ਕਾਂ ਨੇ ਹਿੱਸਾ ਲਿਆ, ਜਦਕਿ ਦਿੱਲੀ ਦਾ ਸ਼ੋਅ 55 ਹਜ਼ਾਰ ਦਰਸ਼ਕਾਂ ਨਾਲ ਦੇਸ਼ ਦਾ ਸਭ ਤੋਂ ਵੱਡਾ ਲਾਈਵ ਸ਼ੋਅ ਬਣਿਆ। ਰਿਪੋਰਟ ਮੁਤਾਬਕ ਟਿਕਟਾਂ ਅਤੇ ਸਪਾਂਸਰਸ਼ਿਪ ਤੋਂ 276 ਕਰੋੜ ਰੁਪਏ ਦੀ ਸਿੱਧੀ ਆਮਦਨੀ ਹੋਈ, ਜਦਕਿ ਦਰਸ਼ਕਾਂ ਦੇ ਯਾਤਰਾ, ਹੋਟਲ, ਭੋਜਨ ਅਤੇ ਖਰੀਦਦਾਰੀ ‘ਤੇ ਖਰਚੇ ਨਾਲ 553 ਕਰੋੜ ਰੁਪਏ ਦੀ ਵਾਧੂ ਆਰਥਿਕ ਗਤੀਵਿਧੀ ਪੈਦਾ ਹੋਈ। ਇਸ ਟੂਰ ਨੇ ਲੌਜਿਸਟਿਕਸ, ਸੁਰੱਖਿਆ, ਸਟੇਜ ਪ੍ਰੋਡਕਸ਼ਨ ਅਤੇ ਸਥਾਨਕ ਸੇਵਾਵਾਂ ਵਿੱਚ ਹਜ਼ਾਰਾਂ ਲੋਕਾਂ ਲਈ ਮੌਕੇ ਬਣਾਏ ਅਤੇ ਟੀਅਰ-2 ਤੇ ਟੀਅਰ-3 ਸ਼ਹਿਰਾਂ ਤੋਂ ਵੱਡੀ ਭਾਗੀਦਾਰੀ ਨਾਲ ਸੈਰ-ਸਪਾਟਾ ਅਤੇ ਹਾਸਪੀਟੈਲਿਟੀ ਖੇਤਰ ਨੂੰ ਵੀ ਵੱਡਾ ਫ਼ਾਇਦਾ ਮਿਲਿਆ। ਇਹ ਸਫਲਤਾ ਸਿਰਫ਼ ਦਿਲਜੀਤ ਲਈ ਨਹੀਂ, ਸਗੋਂ ਪੂਰੇ ਭਾਰਤੀ ਲਾਈਵ ਮਿਊਜ਼ਿਕ ਉਦਯੋਗ ਲਈ ਇੱਕ ਨਵਾਂ ਬੈਂਚਮਾਰਕ ਸਾਬਤ ਹੋਈ ਹੈ।
