ਅਮਰੀਕਾ ਵਿਚ ਵਾਪਰੇ ਜਹਾਜ਼ ਹਾਦਸੇ ਵਿਚ ਭਾਰਤੀ ਮੂਲ ਦੇ ਡਾਕਟਰ ਜੌਏ ਸੈਣੀ ਤੇ ਪਰਿਵਾਰ ਦੇ ਤਿੰਨ ਜੀਆਂ ਦੀ ਮੌਤ

ਨਿਊ ਯਾਰਕ, 15 ਅਪ੍ਰੈਲ 2025

ਅਮਰੀਕਾ ਦੇ ਨਿਊ ਯਾਰਕ ਵਿਚ ਵਾਪਰੇ ਜਹਾਜ਼ ਹਾਦਸੇ ਵਿਚ ਭਾਰਤੀ ਮੂਲ ਦੇ ਡਾਕਟਰ ਤੇ ਪਰਿਵਾਰ ਦੇ ਤਿੰਨ ਜੀਆਂ ਦੀ ਮੌਤ ਹੋ ਗਈ ਹੈ । ਪਰਿਵਾਰ ਜਨਮ ਦਿਨ ਦੇ ਜਸ਼ਨਾਂ ਲਈ ਕੈਟਸਕਿਲਜ਼ ਪਹਾੜੀਆਂ ਵੱਲ ਜਾ ਰਿਹਾ ਸੀ। ਪਰਿਵਾਰ ਨਿਊ ਯਾਰਕ ਦੇ ਵ੍ਹਾਈਟ ਪਲੇਨਸ ਤੋਂ ਵੈਸਟਚੈਸਟਰ ਕਾਊਂਟੀ ਹਵਾਈ ਅੱਡੇ ਤੋਂ ਨਿੱਜੀ ਜਹਾਜ਼ ‘ਤੇ ਸਵਾਰ ਹੋਇਆ ਸੀ।

ਮੀਡੀਆ ਰਿਪੋਰਟਾਂ ਮੁਤਾਬਕ ਡਬਲ ਇੰਜਨ ਵਾਲਾ ਜਹਾਜ਼ ਹਾਦਸਾਗ੍ਰਸਤ ਹੋਣ ਕਰਕੇ ਉੱਘੇ ਯੁਰੋਗਾਇਨੇਕਾਲੋਜਿਸਟ ਡਾ.ਜੌਏ ਸੈਣੀ, ਉਨ੍ਹਾਂ ਦੀ ਪਤਨੀ ਤੇ ਨਿਊਰੋਵਿਗਿਆਨੀ ਡਾ.ਮਿਸ਼ੇਲ ਗਰੌਫ਼, ਧੀ ਕਰੀਨਾ ਗਰੌਫ਼ (ਸਾਬਕਾ ਐੱਮਆਈਟੀ ਸੌਕਰ ਖਿਡਾਰੀ ਤੇ 2022 ਐੱਨਸੀਏਏ ਵਿਮੈੱਨ ਆਫ਼ ਦਿ ਯੀਅਰ) ਤੇ ਪੁੱਤਰ ਜੇਅਰਡ ਗਰੌਫ, ਪੈਰਾਲੀਗਲ ਦੀ ਮੌਤ ਹੋ ਗਈ।

ਘਟਨਾ ਦੀ ਪੁਸ਼ਟੀ ਕਰਦਿਆਂ ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫ਼ਟੀ ਬੋਰਡ (ਐੱਨਟੀਐੱਸਬੀ) ਨੇ ਇਕ ਵੀਡੀਓ ਬਿਆਨ ਵਿਚ ਕਿਹਾ ਕਿ 12 ਅਪਰੈਲ ਨੂੰ ਦੁਪਹਿਰੇ 12:06 ਵਜੇ ਮਿਤਸੂਬਿਸ਼ੀ ਐੱਮਯੂ-2ਬੀ-40 ਐੱਨ635ਟੀਏ ਨਿਊ ਯਾਰਕ ਵਿਚ ਕਰੇਰੀਵਿਲੇ ਨੇੜੇ ਹਾਦਸਾਗ੍ਰਸਤ ਹੋ ਗਿਆ। ਪਰਿਵਾਰ ਨਿਊ ਯਾਰਕ ਦੇ ਵ੍ਹਾਈਟ ਪਲੇਨਸ ਤੋਂ ਵੈਸਟਚੈਸਟਰ ਕਾਊਂਟੀ ਹਵਾਈ ਅੱਡੇ ਤੋਂ ਨਿੱਜੀ ਜਹਾਜ਼ ‘ਤੇ ਸਵਾਰ ਹੋਇਆ ਸੀ।

ਤਸਵੀਰਾਂ : ਸੋਸ਼ਲ ਮੀਡੀਆ X