ਧੂਰੀ ਨੇੜੇ PRTC ਦੀ ਚੱਲਦੀ ਬੱਸ’ਚੋਂ ਬਾਹਰ ਡਿੱਗੀਆਂ ਮਾਂ -ਧੀ,ਮਾਂ ਦੀ ਹੋਈ ਮੌਤ,ਬੇਟੀ ਜ਼ਖਮੀ

ਨਿਊਜ਼ ਪੰਜਾਬ,15 ਜਨਵਰੀ 2025

PRTC ਦੀ ਬੱਸ ਰਾਹੀਂ ਸੰਘੇੜੇ ਤੋਂ ਨਾਭਾ ਜਾ ਰਹੇ ਪਰਿਵਾਰ ਨਾਲ ਵਾਪਰਿਆ ਭਾਣਾ ਧੂਰੀ ਨੇੜੇ ਪਿੰਡ ਚਾਂਗਲੀ ਦੇ ਮੋੜ ਤੇ ਬੱਸ ਦੀ ਬਾਰੀ ’ਚੋਂ ਇਕ 30 ਸਾਲਾ ਔਰਤ ਅਤੇ ਉਸਦੀ ਬੇਟੀ ਸੜਕ ’ਤੇ ਡਿੱਗ ਪਏ ਜਿਸ ’ਚ ਔਰਤ ਦੀ ਮੌਤ ਹੋ ਗਈ ਅਤੇ ਬੇਟੀ ਜ਼ਖ਼ਮੀ ਹੋ ਗਈ ਹੈ। ਜਿਸ ਨੂੰ ਧੂਰੀ ਦੇ ਸਰਕਾਰੀ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ।

ਹਾਦਸੇ ‘ਚ ਗੰਭੀਰ ਜ਼ਖਮੀ ਹੋਈ ਔਰਤ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ 7 ਸਾਲਾ ਬੱਚੀ ਗੰਭੀਰ ਜ਼ਖਮੀ ਹੋ ਗਈ।ਮ੍ਰਿਤਕ ਦੇ ਪਤੀ ਨੇ ਦਾਅਵਾ ਕੀਤਾ ਕਿ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਪੀ.ਆਰ.ਟੀ.ਸੀ ਸਰਕਾਰੀ ਬੱਸ ਦੇ ਡਰਾਈਵਰ ਨੇ ਬੱਸ ਨੂੰ ਤੇਜ਼ ਰਫ਼ਤਾਰ ਨਾਲ ਮੋੜ ਦਿੱਤਾ ਅਤੇ ਦਰਵਾਜ਼ਾ ਖੁੱਲ੍ਹਾ ਹੋਣ ਕਾਰਨ ਔਰਤ ਬਾਹਰ ਡਿੱਗ ਗਈ। ਔਰਤ ਨੂੰ ਸਿਵਲ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਥਾਣਾ ਸਦਰ ਧੂਰੀ ਦੀ ਪੁਲਿਸ ਨੇ ਬੱਸ ਚਾਲਕ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਲਾਸ਼ ਨੂੰ ਪੋਸਟਮਾਰਟਮ ਲਈ ਸਰਕਾਰੀ ਹਸਪਤਾਲ ਧੂਰੀ ਭੇਜ ਦਿੱਤਾ ਗਿਆ ਹੈ।

ਹਾਦਸੇ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸ਼ਿਕਾਇਤਕਰਤਾ ਰਵੀ ਕੁਮਾਰ ਵਾਸੀ ਪਿੰਡ ਸੰਘੇੜਾ ਜ਼ਿਲ੍ਹਾ ਬਰਨਾਲਾ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਹ ਮਜ਼ਦੂਰੀ ਦਾ ਕੰਮ ਕਰਦਾ ਹੈ। ਬੀਤੀ 15 ਜਨਵਰੀ ਨੂੰ ਉਹ ਆਪਣੀ ਪਤਨੀ ਸੀਮਾ ਉਰਫ ਹਿਨਾ ਅਤੇ ਤਿੰਨ ਧੀਆਂ ਮਹਿਕ, ਪ੍ਰਿਆਲ ਅਤੇ ਦੀਆ ਨਾਲ ਪੀਆਰਟੀਸੀ ਦੀ ਬੱਸ ਵਿੱਚ ਪਿੰਡ ਸੰਘੇੜਾ ਤੋਂ ਨਾਭਾ ਜਾ ਰਿਹਾ ਸੀ। ਉਸ ਦੀ ਪਤਨੀ ਅਤੇ ਵੱਡੀ ਬੇਟੀ ਮਹਿਕ ਬੱਸ ਦੀ ਆਖਰੀ ਸੀਟ ‘ਤੇ ਬੈਠੀਆਂ ਸਨ ਜਦੋਂ ਕਿ ਉਹ ਆਪ ਆਪਣੀਆਂ ਦੋਵੇਂ ਧੀਆਂ ਸਮੇਤ ਅਗਲੀ ਸੀਟ ‘ਤੇ ਬੈਠਾ ਸੀ।

ਸਵੇਰੇ ਸੱਤ ਵਜੇ ਜਦੋਂ ਬੱਸ ਪਿੰਡ ਘਨੌਰੀ ਕਲਾਂ ਤੋਂ ਥੋੜ੍ਹਾ ਪਿੱਛੇ ਚਾਂਗਲੀ ਮੋੜ ਕੋਲ ਪੁੱਜੀ ਤਾਂ ਡਰਾਈਵਰ ਨੇ ਤੇਜ਼ ਰਫ਼ਤਾਰ ਬੱਸ ਨੂੰ ਅਚਾਨਕ ਕੱਟ ਦਿੱਤਾ। ਇਸ ਕਾਰਨ ਉਸ ਦੀ ਪਤਨੀ ਸੀਮਾ ਅਤੇ ਬੇਟੀ ਮਹਿਕ ਅਸੰਤੁਲਿਤ ਬੱਸ ‘ਚੋਂ ਉਤਰ ਕੇ ਸੜਕ ‘ਤੇ ਡਿੱਗ ਗਈਆਂ। ਜਦੋਂ ਸਵਾਰੀਆਂ ਨੇ ਅਲਾਰਮ ਵੱਜਿਆ ਤਾਂ ਬੱਸ ਰੁਕ ਗਈ। ਹਾਦਸੇ ‘ਚ ਸੀਮਾ ਦੇ ਸਿਰ ‘ਤੇ ਸੱਟ ਲੱਗੀ ਅਤੇ ਉਸ ਦੇ ਸਿਰ ਅਤੇ ਨੱਕ ‘ਚੋਂ ਖੂਨ ਵਹਿ ਰਿਹਾ ਸੀ, ਜਦਕਿ ਮਹਿਕ ਦੇ ਬੁੱਲ੍ਹਾਂ ਅਤੇ ਮੱਥੇ ‘ਤੇ ਸੱਟਾਂ ਲੱਗੀਆਂ। ਉਸ ਸਮੇਂ ਐਂਬੂਲੈਂਸ ਦਾ ਕੋਈ ਪ੍ਰਬੰਧ ਨਾ ਹੋਣ ਕਾਰਨ ਦੋਵਾਂ ਨੂੰ ਬੱਸ ਵਿੱਚ ਬਿਠਾ ਕੇ ਸਰਕਾਰੀ ਹਸਪਤਾਲ ਧੂਰੀ ਪਹੁੰਚਾਇਆ ਗਿਆ। ਡਾਕਟਰ ਨੇ ਸੀਮਾ ਨੂੰ ਮ੍ਰਿਤਕ ਐਲਾਨ ਦਿੱਤਾ, ਜਦੋਂ ਕਿ ਸੱਤ ਸਾਲਾ ਬੇਟੀ ਮਹਿਕ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਦਾ ਇਲਾਜ ਸ਼ੁਰੂ ਕਰ ਦਿੱਤਾ।