“ਪੰਜਾਬ ਦੀਆਂ ਧੀਆਂ ਦਾ ਹਾਕੀ ਮੇਲਾ” ਜਰਖੜ ਖੇਡ ਸਟੇਡੀਅਮ ਵਿਖੇ ਸ਼ੁਰੂ – ਪੰਜਾਬ ਸਰਕਾਰ ਖਿਡਾਰਨਾ ਲਈ ਇੱਕ ਵੱਖਰੀ ਖੇਡ ਨੀਤੀ ਲਿਆਵੇ 

ਮੁਢਲੇ ਗੇੜ ਦੇ ਮੈਚਾਂ ਵਿੱਚ ਹਿਮਾਚਲ, ਮੁਕਤਸਰ, ਹੁਸ਼ਿਆਰਪੁਰ ਰਹੇ ਜੇਤੂ

ਨਿਊਜ਼ ਪੰਜਾਬ 

ਜਰਖੜ (ਲੁਧਿਆਣਾ ), 24 ਮਾਰਚ :- ਪੰਜਾਬ ਦੀ ਮਸ਼ਹੂਰ ਖੇਡਾਂ ਜਰਖੜ ਦੇ ਖੇਡ ਸਟੇਡੀਅਮ ਵਿਖੇ “ਪੰਜਾਬ ਦੀਆਂ ਧੀਆਂ ਦਾ ਹਾਕੀ ਮੇਲਾ ” ਧੂਮ ਧੜੱਕੇ ਨਾਲ ਸ਼ੁਰੂ ਹੋਇਆ ।

ਇਸ ਵਕਾਰੀ ਟੂਰਨਾਮੈਂਟ ਦਾ ਉਦਘਾਟਨ 1982 ਏਸ਼ੀਅਨ ਗੇਮਜ਼ ਹਾਕੀ ਦੇ ਗੋਲਡ ਮੈਡਲਿਸਟ, ਓਲੰਪੀਅਨ ਸ਼ਰਨਜੀਤ ਕੌਰ ਅਤੇ ਸ੍ਰੀਮਤੀ ਡਾਕਟਰ ਸੁਖਚੈਨ ਗੋਗੀ ਧਰਮ ਪਤਨੀ ਸਵਰਗੀ ਵਿਧਾਇਕ ਗੁਰਪ੍ਰੀਤ ਸਿੰਘ ਗੋਗੀ ਨੇ ਕੀਤਾ। ਇਸ ਮੌਕੇ ਆਏ ਮਹਿਮਾਨਾਂ ਨੇ ਜਿੱਥੇ ਪੰਜਾਬ ਦੀਆਂ ਧੀਆਂ ਦੇ ਹਾਕੀ ਮੇਲੇ ਦੇ ਉਪਰਾਲੇ ਦੀ ਸਲਾਘਾ ਕੀਤੀ ਉਥੇ ਉਹਨਾਂ ਦੱਸਿਆ ਕਿ ਇਹ ਉਪਰਾਲਾ ਬੱਚਿਆਂ ਲਈ ਇੱਕ ਪ੍ਰੇਰਨਾ ਸਰੋਤ ਹੈ। ਉਹਨਾਂ ਆਖਿਆ ਕਿ ਪੰਜਾਬ ਸਰਕਾਰ ਨੂੰ ਕੁੜੀਆਂ ਲਈ ਇੱਕ ਵੱਖਰੀ ਖੇਡ ਨੀਤੀ ਤਿਆਰ ਕਰਨੀ ਚਾਹੀਦੀ ਹੈ। ਇਸ ਮੌਕੇ ਟੂਰਨਾਮੈਂਟ ਦਾ ਉਦਘਾਟਨ ਗੁਬਾਰੇ ਉੱਡਾਕੇ ਕੀਤਾ ਗਿਆ ਅਤੇ ਟੂਰਨਾਮੈਂਟ ਵਿੱਚ ਸ਼ਾਮਲ ਟੀਮਾਂ ਨਾਲ ਆਏ ਮਹਿਮਾਨਾਂ ਨੇ ਜਾਣ ਪਹਿਚਾਣ ਕੀਤੀ।

ਇਸ ਮੌਕੇ ਜਰਖੜ ਹਾਕੀ ਅਕੈਡਮੀ ਦੇ ਪ੍ਰਬੰਧਕਾਂ ਤੋਂ ਇਲਾਵਾ ਅੰਤਰਰਾਸ਼ਟਰੀ ਵੇਟ ਲਿਫਟਰ ਹਰਦੀਪ ਸਿੰਘ ਸੈਣੀ, ਪਰਨੀਤ ਕੌਰ ਯੂਐਸਏ, ਪਰਮਜੀਤ ਕੌਰ ਸਰਾਂ, ਅਵਨੀਤ ਕੌਰ ਪੰਧੇਰ,ਗੁਰਦੀਪ ਸਿੰਘ ਗਰੇਵਾਲ ਜਿਲਾ ਖੇਡ ਅਫਸਰ ਮਲੇਰਕੋਟਲਾ, ਸਰਪੰਚ ਸੰਦੀਪ ਸਿੰਘ ਜਰਖੜ, ਖੇਡਾਂ ਦੇ ਮੁੱਖ ਪ੍ਰਬੰਧਕ ਜਗਰੂਪ ਸਿੰਘ ਜਰਖੜ, ਸਰਪੰਚ ਸੰਦੀਪ ਸਿੰਘ,, ਤੇਜਿੰਦਰ ਸਿੰਘ ਜਰਖੜ, ਪ੍ਰਬੰਧਕ ਗੁਰਸਤਿੰਦਰ ਸਿੰਘ ਪ੍ਰਗਟ, ਪਰਮਜੀਤ ਸਿੰਘ ਪੰਮਾ ਗਰੇਵਾਲ, ਅਰਵਿੰਦਰ ਕੌਰ ਰੋਜੀ ਸ੍ਰੀਮਤੀ ਸੋਨੀਆ, ਬਲਜੀਤ ਕੌਰ ਅਮਨਦੀਪ ਕੌਰ ਸਿੱਧੂ ਫਰੀਦਕੋਟ, ਅਤੇ ਹੋਰ ਪ੍ਰਬੰਧਕ ਅਤੇ ਖਿਡਾਰਨਾਂ ਵੱਡੀ ਗਿਣਤੀ ਵਿੱਚ ਹਾਜ਼ਰ ਸਨ

ਟੂਨਾਮੈਂਟ ਦੇ ਉਦਘਾਟਨੀ ਮੈਚ ਵਿੱਚ ਕੰਗ ਇਲਵੈਨ ਨੇ ਹਿਮਾਚਲ ਪ੍ਰਦੇਸ਼ ਨੂੰ 5-2 ਨਾਲ ਹਰਾਇਆ। ਜਦ ਕਿ ਦੂਸਰੇ ਮੈਚ ਵਿੱਚ ਰੰਧਾਵਾ ਇਲੇਵਨ ਮੁਕਤਸਰ ਨੇ ਥਿੰਦ ਸੰਗਰੂਰ ਨੂੰ 11 ਨਾਲ ਹਰਾਇਆ। ਦੂਸਰੇ ਗੇੜ ਦੇ ਮੈਚਾਂ ਵਿੱਚ ਰੰਧਾਵਾ ਇਲੇਵਨ ਮੁਕਤਸਰ ਨੇ ਹੁਸ਼ਿਆਰਪੁਰ ਕੰਗ ਇਲੇਵਨ ਨੂੰ 5-1 ਨਾਲ ਹਰਾਇਆ ਜਦਕਿ ਹਿਮਾਚਲ ਪ੍ਰਦੇਸ਼ ਨੇ ਸੰਗਰੂਰ ਨੂੰ 5-1 ਨਾਲ ਹਰਾ ਕੇ ਫਾਈਨਲ ਵਿੱਚ ਪੁੱਜਣ ਦੀਆਂ ਆਪਣੀਆਂ ਸੰਭਾਵਨਾਵਾਂ  ਕਾਇਮ ਰੱਖੀਆਂ। ਇਹ ਟੂਰਨਾਮੈਂਟ ਲੀਗ ਕਮ ਨਾਕ ਅਉਟ ਦੇ ਆਧਾਰ ਤੇ ਖੇਡਿਆ ਜਾ ਰਿਹਾ ਹੈ। ਜਰਖੜ ਹਾਕੀ ਅਕੈਡਮੀ ਵੱਲੋਂ ਸਾਰੀਆਂ ਟੀਮਾਂ ਨੂੰ ਖਾਣ ਪੀਣ ਅਤੇ ਰਹਿਣ ਦੀਆਂ ਸੇਵਾਵਾਂ ਮੁਹਈਆ ਕਰਵਾਈਆਂ ਜਾ ਰਹੀਆਂ ਹਨ।